Rafa Benitez në dorë të Fernando Torresit

Liverpul

Torres, kampion europian në 2008, ka shënuar 50 gola për Liverpulin, më shumë se cilido tjetër në një periudhë të shkurtër. Ndërkaq, spanjolli tjetër Riera nuk do të largohet nga Benitezi, kurse ukrainasi Voronin pritet të shkojë në Rusi

Pesë herë kampionët e Europës, “The Reeds”-at e Liverpulit, po mendojnë të jenë të përqendruar në ruajtjen e bazës së skuadrës në këtë fillimviti. Trajneri spanjoll, Rafael Benitez, në një sezon të tronditur dhe pa sukses, me dështim të madh në Ligën e Kampionëve, pranë së njëjtës gjendje në Premier Ligë, në rrezik eliminimi në FA Cup pas barazimit 1-1 me Reading, duhet të mbajë në lojë dhe të motivuar për ekipin për të paktën një vend mes katër të parëve që e lejon të shkojë në Ligën e Kampionëve. Për të arritur këto objektiva, Benitezin mund ta ndihmojë shumë bashkatdhetari i tij, sulmuesi Fernando Torres.

“El Ninjo” Torres, kampion europian me Spanjën në 2008, është njëri prej sulmuesve më të spikatur në Premier Ligën angleze. Ai ka arritur shifrën e 50 golave me fanellën e Liverpulit, për një kohë më të shkurtër se cilido futbollist në historinë e “The Reeds”-ave. Torres premton rekorde të reja në skuadrën e kuqe. “Nuk mund të besoj, sepse Liverpuli nuk është një klub i vogël, është njëri nga klubet më të mëdha dhe më historik në botë. Të gjithë futbollistët që kanë luajtur këtu, janë futbollist të kalibrit të lartë dhe të cilët kanë shënuar shumë gola. Dua të vazhdoj të thyej rekorde të këtilla, ashtu që të jem gjithmonë në libra dhe në kujtesën e njerëzve”, tha Torres. Ndërkohë, menaxheri i spanjollit tjetër, Albert Rieras, ka mohuar spekulimet rreth transferimit të mesfushorit për tek Olympiakos i Pireut. Së fundmi thuhej se gjiganti grek është i interesuar për reprezentuesin spanjoll, i cili është duke kaluar një sezon të vështirë në “Anfield  Road” pas debutimit produktiv në edicionin e kaluar. Por përfaqësuesi i tij, Angel Castell, ka thënë se ai nuk ka kontaktuar me Olympiakosin dhe se klienti i tij nuk planifikon të largohet nga Liverpuli. “Nuk kam dëgjuar asgjë nga Olympiakos. Albert ka edhe dy vjet kontratë me Liverpulin”, tha Castell. Sakaq, nga Liverpuli besohet të largohet sulmuesi ukrainas Andriy Voronin. Menaxheri i Voroninit ka konfirmuar se sulmuesi është duke shqyrtuar transferimin në Rusi. Reprezentuesi ukrainas nuk zë vend në planet e Rafa Benitezit dhe besohet se do të shitet gjatë këtij afati kalimtar të janarit. Dinamo Moska thuhet se është klubi rus i interesuar për Voroninin, ndërsa menaxheri i futbollistit Andriy Golovach ka konfirmuar se klienti i tij do të largohet nga Anfield. “Ai ka marrë një ofertë konkrete nga një klub rus dhe do të marrë vendim rreth saj”, tha Golovach.

Shkrimi i dytë me foto mehmet hetemaj në rrjet

Hetemaj, i kënaqur tek Albinoleffe

Albinoleffe e ka nisur mjaft mirë vitin 2010 në Serinë B. Të martën, ekipi i Mehmet Hetemajt ka arritur një fitore të rëndësishme në shtëpi të Padovas me rezultat 0:2. Mesfushori shqiptar pati një paraqitje mjaft të mirë dhe kontribuoi në ngadhënjimin e skuadrës së tij, pas pauzës së festave të fundvitit. Kjo fitore e ka ngritur Albinoleffen në tabelë dhe ky ekip tashmë merr frymë më lirshëm. “Për momentin po ndihem shumë mirë që po luaj, sepse besimi në vetvete është në vendin e duhur dhe ekipi po luan shumë mirë”, ka thënë përfaqësuesi U21 i Finlandës për uebfaqen finlandeze “mtv3.fi”. Hetemaj ka luajtur pak më shumë se një orë, në pjesën e djathtë të mesfushës. “Në pjesën e parë kisha kontakt të shpeshtë me topin dhe kam bërë punë të mirë në të dyja anët, në fazën ofensive dhe defensive. Loja ishte asi soji që duhej të vrapoja lart e poshtë. Pjesa e parë shkoi shumë mirë, por edhe e dyta. Pas pak më shumë se një orë, trajneri më ndërroi, kur fillova të ndihesha i lodhur. Mirëpo do të mund të vazhdoja të luaja ende në të njëjtin ritëm”, buzëqesh Hetemaj. Golat për Albinoleffen u shënuan në pjesën e dytë me realizues Foglion (67’) e Ruopolon (78’).

Hendrit Ferra bashkohet me Tiranën

Hendrit Ferra është përforcimi i parë i merkatos dimërore të Tiranës. Sulmuesi 20-vjeçar ishte huazuar te Teuta e Durrësit (6 ndeshje këtë sezon). Ferra do të jetë pjesë e grupit të kampionëve në fuqi që do të udhëtojnë të shtunën në grumbullimin në Turqi. Lajmin e dha dje “Albania-Sport”.

Patrick Vieira pranë kalimit te Man.City

Patrick Vieira u është nënshkruar vizitave mjekësore të enjten para kompletimit të transferimit për 18 muaj në Manchester City. Ish-kapiteni i Arsenalit spekulohej me rikthim në Premier Ligë, pasi deri më tani gjatë këtij sezoni kishte bërë vetëm 16 paraqitje në të gjitha garat për Interin, shumica prej tyre si rezervist. Tani, ai pritet t’i bashkohet menaxherit të City-t, Roberto Mancini, i cili e kishte transferuar Vieiran tek Interi më 2006. “Dua të luaj në Kampionatin Botëror dhe është me rëndësi për mua të shkoj në Manchester City”, tha Vieira për “Eurosport”.

Puyol lëshon një mesazh për Argjentinën

Carles Puyol, futbollist i Barcelonës, ka një mesazh të fortë për kombëtaren e Argjentinës. Ai ka thënë se Argjentina duhet të nxjerrë më shumë nga futbollisti Lionel Messi. “Argjentina duhet të përpiqet të shfrytëzojë nga talenti i tij. Leo Messi, i cili është futbollist i shkëlqyeshëm, një element esencial për Barcelonën tonë. Me të, Barcelona është më e fuqishme. Logjikisht, kështu duhet të jetë edhe për Argjentinën”, tha Puyol.

Alex: Chelsea, Arsenali është një rrezik

 Mbrojtësi i Chelseas, Alex, beson se Arsenal do të jetë rivali kryesor për titull në Premier Ligë, këtë sezon. Topçinjtë, aktualisht kanë dy pikë më pak se Manchester United dhe katër më pak se Chelsea, me një ndeshje më pak të zhvilluar. Por Alex beson se ata janë kërcënimi më i madh në garë për titull. “Arsenal do të shfaqë konkurrencën më të fortë për titull. Ata luajnë mirë dhe kanë besim në të gjitha ndeshjet. Ata janë në formën e tyre më të mirë këtë sezon”, tha Alex për “London Evening Standard”.

Van der Vaart nuk largohet nga Madridi

Mesfushori i Real Madridit, Rafael Van der Vaart, ka ritheksuar dëshirën të mbetet në “Santiago Bernabeu dhe” të luftojë për të ardhmen e tij me gjigantin spanjoll. Lojtari i Kombëtares së Holandës spekulohej se mund të transferohet në Premier Ligë, por ai ka theksuar se synon të qëndrojë në Madrid. “Kam aftësi dhe kualitete për të luajtur për Real Madridin. Pavarësisht konkurrencës së fortë në ekip, nuk do të largohem nga Real. Dua të luftoj”, deklaroi ai për radio “Marçën”.

Ol.Marseille: Ben Arfa kushton shtrenjtë

Presidenti i Olympique Marseille, Jean-Claude Dassier, ka bërë të ditur se klubi nuk planifikon ta shesë mesfushorin Hatem Ben Arfa, por ka theksuar se janë të gatshëm të vlerësojnë ofertat prej rreth 45 milionë euro për yllin francez. “Nëse një klub si Manchester United ose Real Madrid ofron 45 milionë euro, atëherë do të mendojmë dy herë. Nuk besoj se kjo do të ndodhë, por afati kalimtar zgjat një muaj”, tha Dassier. Ben Arfa ka dështuar të tregojë formë të mirë në Marseille, pas transferimit nga Lyon, 18 muaj më parë.

Arsen Wenger kërkon Traoren nga Cluji

Menaxheri i Arsenalit, Arsene Wenger, është duke konsideruar mundësinë e transferimit të sulmuesit të Cluj, Lacina Traore për të përforcuar repartin ofensiv. Lëndimet e Robin van Persiet dhe Nicklas Bendtnerit kanë detyruar Wengerin të kërkoj sulmues të ri, ndërsa Traore tashmë ka pranuar se ëndërron të luajë në “Emirates Stadium”. “Jam shumë i lumtur që përcillem nga Wenger. Edhe pse jam ende i ri, kam ambicie të mëdha”, tha 19-vjeçari.