Goditet me dy granata në derë të lokalit

Bashkëshortja 63-vjeçare e pronarit të lokalit i shpëtoi për mrekulli vdekjes, pas granatave të hedhura nga i sëmuri mendor

Leon Kaoni

SARANDË - E premtja ende nuk kishte zbardhur mirë, kur shpërthimi i granatës së hedhur me dashje nga 65-vjeçari Enver Myrtaj ka shpërthyer në qindra copa vetëm 15 metra larg portës së lokalit të Ilmi Bajramit, në qendër të qytezës së Ksamilit. Shpërthimi, i ndodhur rreth orës 05:30, ka qenë shumë i zhurmshëm dhe ka nxjerrë në rrugë banorët e lagjes më të vjetër të qytezës. Ata janë ndeshur me trupin e shtrirë në xhade të bashkëshortes së pronarit të lokalit, Xhevahire Bajramit, 63 vjeçe. Siç mësohet, gruaja ishte drejtuar për te lokali i saj për të ngrohur ekspresin, në mënyrë që të niste punën sa më shpejt. Banorët e mbërritur në vendngjarje kanë transportuar me urgjencë të dëmtuarën për në spitalin e Sarandës. Autori i ngjarjes së rëndë kohë më parë është goditur nga hemorragjia cerebrale dhe ka mbetur me pasoja dëmtimi në tru.

Dëshmia

 “U çova si zakonisht në orën 5 të mëngjesit, pasi më duhet të ndez ekspresin e kafes, se pas orës 06:00 nisin e vijnë klientët. Kamarierët dhe djali i kthyer këtë muaj nga Greqia ku punonte si emigrant do të vinin më vonë. Kur iu afrova lokalit rreth 15 metra, para meje si rrufe plasi një send i hedhur nga dikush që fshihej pas pemës në anë të rrugës. Pas pak sekondash, nga po i njëjti vend erdhi edhe një tjetër send i rrumbullakët, por që nuk plasi”. Kështu e përshkruan momentin e ngjarjes që desh i mor jetën, e traumatizuara Xhevahire Bajrami. Granata e dytë defensive që i sëmuri mendor hodhi në drejtim të gruas nuk ka shpërthyer. “Fati qëlloi që ishte me mua këtë mëngjes. E njoha agresorin, pasi m’u afrua të shikonte nëse kisha vdekur apo jo. Unë gjeta forca e i thashë: “Më vrave”, - ndërsa ai m’u përgjigj: “Ta bëra mirë, tani vdis”! - dhe u largua duke çaluar, se është i paralizuar dhe i goditur në tru”, e vazhdon rrëfimin e saj për ngjarjen 63-vjeçarja. Ajo tregon se pas kësaj mezi ka gjetur frymë për të thirrur dhe të parët që i kanë ardhur në ndihmë kanë qenë komshinjtë. Ata e kanë dërguar në spitalin e Sarandës.

Mjekët thonë e plagosura ka plagë sipërfaqësore në të gjithë trupin, por asnjëra nuk rrezikon jetën e saj. Vetë e dëmtuara pohon: “Prej vitesh Enver Myrtoja ka kanosur me radhë pjesëtarët e familjes Bajrami. Në Ksamil kemi bërë edhe denoncim në polici e Prokurorinë e Sarandës dhe tek i plotfuqishmi i zonës, për kanosjen e jetës dhe të pronës nga ky person dhe është neglizhuar rrezikshmëria e tij, duke na thënë se është i papërgjegjshëm”.

Gruaja tregon se çdo ditë me të shkonte në atë orë në lokal edhe nipi i saj jetim, prindërit e të cilit janë mbytur në vitin 2005 në Bistricë, pas një aksidenti automobilistik. Për fatin e mirë, djaloshin atë ditë e kishte mundur gjumi dhe nuk kishte shkuar në lokal me gjyshen. Agresori Enver Myrto, 65 vjeç, u ndalua nga policia pak kohë pas ngjarjes dhe me urdhër të prokurorisë në ngarkim të tij filloi procedimi penal “për vrasje me dashje”.