Varfëria, vetëvaret në hyrje të qytetit emigranti

Në një letër për familjarët shkruante se nuk mund ta përballonte më jetën e emigrantit. Kalimtarët që e panë të ngjitej në pemë, nuk e menduan se do të vetëvarej

 SHKODËR - Ishte kthyer në vendlindjen e tij për të kaluar pushimet e për t’u çmallur me të afërmit, por gjendja e vështirë në të cilën jetonte në Itali si emigrant e kanë shtyrë drejt një fundi të hidhur. 45-vjeçari ka vendosur t’i japë fund jetës, duke u vetëvarur në një pemë në hyrje të qytetit të Shkodrës. Pak kohë përpara se të kryente një veprim të tillë, Mark Deda, banor i fshatit Ashtë, komuna Bushat në Shkodër, por emigrant prej vitesh në Itali, kishte shkruar një letër, që u bënte të ditur familjarëve të tij për vendimin ekstrem për t’i dhënë fund jetës.

Ngjarja

Paraditen e djeshme, Deda, pasi ka shkruar letrën për familjen e tij, ka hipur në një furgon dhe është nisur drejt qytetit të Shkodrës. Sapo ka mbërritur në hyrje të qytetit, diku rreth orës 13:00, ai ka zbritur nga furgoni dhe i është drejtuar një plepi të lartë që ndodhej bri rrugës hyrëse të qytetit. Ka hipur në të, ka vendosur litarin në qafë dhe është lëshuar teposhtë. Fillimisht njerëzit nuk kanë kuptuar gjë dhe kanë menduar se kanë të bëjnë me ndonjë person me probleme mendore, që ka vendosur të ngjitet në pemë, por kur kanë parë që ai është vetëvarur, kanë njoftuar menjëherë policinë dhe janë përpjekur që të ngjiten në pemë për ta shpëtuar. Me gjithë ndërhyrjen e kalimtarëve të rastit, Deda nuk ka arritur të mbijetojë dot. Nga veprimet e para hetimore të kryera, si dhe nga marrja ne pyetje e familjareve, rezultoi se i lartpërmenduri jetonte emigrant në Itali prej shumë vitesh dhe sapo ishte kthyer në Shqipëri për pushime.

Letra

Sipas burimeve të informacionit nga policia lokale, në letrën e lënë për familjarët, Deda u kërkonte falje atyre për veprimin që kishte vendosur të kryente. Ai gjithashtu u ka shpjeguar atyre edhe motivet që e kanë detyruar të ndërmerrte një hap të tillë, që ka qenë pamundësia për ta përballuar jetën në Itali, ku ai ndodhej prej vitesh si emigrant së bashku me gruan dhe 4 fëmijët.

Pasi ka gjetur të vetëvarur 45-vjeçarin, policia menjëherë ka marrë në pyetje të afërmit të viktimës, nga ku është mësuar se i ndjeri mendohet të ketë shfaqur shenja depresive edhe më parë, por pa ndonjë shkak konkret. Gjithashtu, familjarët i kanë dorëzuar policisë edhe letrën që Deda e kishte shkruar para se të kryente vetëvarjen dhe e kishte lënë në shtëpi. Ata i kanë thënë policisë, se kur kanë lexuar letrën dhe kanë mësuar se Marku donte të vetëvritej, e kanë kërkuar nëpër fshatin e tij të lindjes, në Ashtë, por asnjërit nuk i ka shkuar ndërmend se ai do ta kryente një veprim të tillë në Shkodër.