Shoah, Teherani provokon sërish shtetin hebre

“Një ditë do të shohim Izraelin të shkatërruar”. Ajatollahu Ali Khamenei rishpall apelin e Ahmadinexhadit “për të zhdukur vendin nga harta e botës”

 “Me siguri që do të vijë dita, në të cilin vendet e rajonit do të shohin shkatërrimin e regjimit zionist. Koha se kur do të ndodhë kjo varet nga mënyra sesi vendet islamike do të përballojnë këtë çështje”. Me këto fjalë, në Ditën e Kujtesës, udhëheqësi suprem i Iranit, Ali Khamenei, invokoi sërish zhdukjen e Izraelit, duke rideklaruar apelin e presidentit Mahmud Ahmadinexhad, për “ta zhdukur shtetin hebre nga harta e botës” dhe për të interpretuar Holokaustin si një mit. Khamenei priti në një takim presidentin e Mauritanisë, Mohammed Ould Abdel Aziz dhe e ftoi shtetin afrikan të prishë një herë e përgjithmonë marrëdhëniet me Izraelin, rrugë të cilën Nouakchott (kryeqyteti i Mauritanisë) nisi ta përshkonte në janar të vitit të kaluar, me pezullimin e marrëdhënieve diplomatike me shtetin hebre.

Përkujtohet Shoah

Takime, kremtime, ekspozita dhe përkujtimore. Një program i shumëllojshëm që rrotullohej ndaj një objektivi të madh e të vetëm: të mos harrojmë ditën e nazizmit, kampet e përqendrimit dhe zhdukjen masive të mijëra hebrenjve me mënyra nga më të tmerrshmet. E gjithë bota kremtoi dje Ditën e Kujtesës nëpër ish-kampet e përqendrimit, në Auzhvicin famëkeq, nëpër kryeqytetet e kombeve që vuajtën nga afër dramën e deportimit të hebrenjve. Papa Benedikti XVI, në përfundim të audiencës, kujtoi lirimin e mbi 7 mijë të burgosurve nga kampi i Auzhvicit, pikërisht 65 vjet më parë. “Një ngjarje e tillë dhe dëshmitë e të mbijetuarve i treguan botës tmerrin e krimeve të padëgjuara të kryera në kampet e krijuara nga Gjermania naziste. Sot kremtohet Dita e Kujtesës, në kujtim të të gjithë viktimave e atyre krimeve, veçanërisht nga asgjësimi i planifikuar i hebrenjve”, - tha kreu i Kishës Katolike. “Me shpirtin e prekur, mendojmë për viktimat e panumërta të një urrejtje të verbër racial dhe fetare, që vuajtën deportimin, burgosjen dhe vdekjen në vende çnjerëzore. Zoti i plotfuqishëm ndriçoftë zemrat dhe mendjet që të mos përsëriten më tragjedi të tilla”!

Mrekullia

Haiti, një i mbijetuar 14 ditë pas tërmetit

Ushtarët amerikanë kanë arritur të nxjerrin një të mbijetuar nga gërmadhat e një ndërtese të shembur në Haiti, dy javë pas tërmetit shkatërrues të 12 janarit. Burri u transportua menjëherë në spital dhe sipas mjekëve, është jashtë rrezikut për jetën. “Kishte një këmbë të thyer, por do t’ia hedhë. Nuk e dimë nëse ndodhej aty që nga fillimi apo mbeti i bllokuar gjatë një prej tërmeteve të mëpasshme”, - tha një ushtar pas operacionit të shpëtimit. Dëshmitarët thanë për “Rojters”, se burri, që ishte vetëm me të brendshme dhe i mbuluar nga pluhuri, u shpëtua nga ushtarët amerikanë gjatë gërmimeve në një ndërtesë të shembur, dy ditë pas përfundimit zyrtar të kërkimit për të mbijetuar. Ushtarët që e shpëtuan, në një rrugë me emrin mëse të përshtatshëm për ngjarjen, “Rue de Miracles”, (Rruga e mrekullive), thanë se i mbijetuari ishte shumë i dehidratuar. Ai është personi i 134-rt që nxirret i gjallë nga gërmadhat pas tërmetit që shkaktoi 150 mijë të vdekur në ishullin karaibik. Ndërkohë, rasti “Bertolaso” është mbyllur tashmë për SHBA-të dhe këtë e konfirmoi vetë ambasadori amerikan në Romë, David Thorne, i cili mori pjesë në ceremoninë e organizuar në Dhomën e Parlamentit Italian me rastin e Ditës së Kujtesës.

Spanjë

Hidhet nga pallati për t’u vetëvrarë, por vret një kalimtare

 Është nga ato ngjarjet sa të dhimbshme, aq edhe të pabesueshme, ajo që ka ndodhur në Spanjë. Një kalimtare 80-vjeçare mbeti e vrarë në Malaga nga një vajzë e re, e cila po tentonte të vetëvritej, duke u hedhur nga dritarja e katit të tetë e një pallati në Qytetin Studenti të qytetit spanjoll dhe i ra përsipër. Sipas edicionit online të së përditshmes “El Mundo”, për një lojë të fatit, vajza e cila u hodh nga dritarja arriti të mbijetojë, ndërsa e moshuara natyrisht vdiq në vend. E reja, kandidate për t’u vetëvrarë, tashmë ndodhet e shtruar në spitalin “Carlos Haya” të qytetit Malaga, dhe sipas mjekëve ka vetëm krah dhe një këmbë të frakturuar. Sipas disa dëshmitarëve të incidentit, rënia e saj fillimisht u ngadalësua nga degët e një peme dhe më pas u amortizua nga trupi i zonjës së moshuar dhe të pafat, që shërbeu si jastëk, duke i shpëtuar jetën 18-vjeçares. Sipas nënës së vajzës, ajo po kurohej për një depresion të lehtë dhe për pasojë nuk ishte në gjendje të qëndrueshme mendore.

Gjermania rrit numrin e trupave në Afganistan

 Dy ditë përpara fillimit të konferencës ndërkombëtare në Londër, qeveria gjermane prezantoi strategjinë e saj për Afganistanin, ku në qendër të saj ndodhet rritja e kontingjentit ushtarak deri me 850 ushtarë. Sipas kancelares gjermane Angela Merkel, Gjermania shkon e “përgatitur mirë” në konferencën ndërkombëtare për Afganistanin. Koncepti ka marrë aprovimin ndërkombëtar, kryesisht të SHBA-ve, Britanisë së Madhe dhe Francës, tha Angela Merkel. Numri i ushtarëve të stacionuar me afat të gjatë në Afganistan do të rritet nga 4500 deri në 5000. Forcat e reja do t’i shtohen batalionit që merret me specializimin e ushtarëve dhe policëve afganë dhe me mbrojtjen. Përveç kësaj, qeveria gjermane do të krijojë një trupë rezervë, e cila mund të përdoret për misione afatshkurtra në rast nevoje. Për shembull, një mision për sigurimin e zgjedhjeve që parashikohet të mbahen në vjeshtë, shpjegoi kancelarja Merkel. Misionin gjerman ajo e cilësoi si “defensiv”, të bazuar në bindjen se “pa siguri nuk mund të ketë rindërtim të vendit dhe pa rindërtim nuk mund të ketë siguri”. Ndërkohë, strategjia e re parashikon edhe dyfishimin e kontributit financiar gjerman në Afganistan. Paketa gjermane për konferencën e Afganistanit në Londë, ka një vëllim prej 430 milionë eurosh në vit, një shumë që përbën gati dyfishin e asaj të deritanishme prej 220 milionë eurosh. Përveç kësaj, Gjermania do të marrë pjesë me 50 milionë euro në një fond ndërkombëtar, me të cilin do të financohet riintegrimi i ish-luftëtarëve talebanë në shoqërinë civile afgane, bëri të ditur kryetarja e qeverisë. Pa përgjigje mbetet pyetja se për sa kohë do të zgjasë angazhimi në Afganistan. Kancelarja Merkel nuk përmendi datë konkrete për tërheqjen e trupave gjermane. Ajo përkrah objektivat e qeverisë afgane dhe të presidentit Karsai, që deri në vitin 2014 të mund të garantohet siguria në vend. Njësoj u shpreh edhe ministri i Jashtëm gjerman, Guido Westerwelle: “Qeveria gjermane nuk është për vendosjen e një afati, në të cilin të jetë arritur gjithçka dhe duhet bërë menjëherë tërheqja. Unë flas për një proces, për procesin e dorëzimit të përgjegjësive, hap pas hapi, distrikt për distrikt, duke filluar që këtë vit. Në mënyrë që të marrë sa më shumë përkrahje nga publiku dhe parlamenti për konceptin e saj për Afganistanin, kancelarja Merkel informoi më parë kryetarët e fraksioneve të të gjitha partive. Socialdemokratët opozitarë thanë se do të japin votën e tyre, vetëm nëse tërheqja e trupave gjermane fillon vitin tjetër dhe nëse dërgimi i trupave bëhet në bazë të një afati të caktuar, siç bëri të ditur kryetari i partisë, Sigmar Gabriel. Ekologjistët duan të presin një herë zhvillimin e konferencës për Afganistanin, para se të marrin vendime. Mosbesim ndaj strategjisë së deritanishme për Afganistanin ka shprehur edhe Kryqi i Kuq Ndërkombëtar.