Hyrje | Aktualitet | Rama: Marrëveshja me Greqinë e pavend, të zmbrapset, të ketë rinegocim

Rama: Marrëveshja me Greqinë e pavend, të zmbrapset, të ketë rinegocim

Madhesia e germave:

Forcat opozitare të majta e të djathta nënshkruan dokumentin, ku gjykatës i kërkohet pezullimi, në mënyrë që të mos ratifikohet marrëveshja. Nisin protestat

Shtatë forca politike nënshkruan kërkesën ligjore drejtuar Gjykatës Kushtetuese për të penguar miratimin e marrëveshjes për kufijtë detarë me Greqinë. Përshkallëzimi i debatit për marrëveshjen e kufijve detarë me shtetin grek, ku pretendohet se është cënuar territori i shtetit shqiptar, e ka detyruar opozitën që të ndërmarrë hapa konkretë për të kundërshtuar miratimin e kësaj marrëveshjeje në parlament. Ditën e sotme pritet që kërkesa ligjore e firmosur nga 7 krerë forcash të majta e të djathta të dorëzohet në Gjykatën Kushtetuese, së cilës i kërkohet që të rrëzojë marrëveshjen, me argumentin se është antikushtetuese dhe për t’i hapur rrugë nënshkrimit të një marrëveshjeje të re, ku nuk cënohet territori shqiptar. Shtatë forca opozitare, të kryesuara nga Partia Socialiste, nënshkruan pasditen e djeshme kërkesën për gjykatën, ndërsa paralajmëruan nisjen e protestave të enjten e ardhshme para Ministrisë së Jashtme dhe Kuvendit. Kreu i Partisë Socialiste, Edi Rama, së bashku me krerët e forcave të tjera të koalicionit opozitar, përfshirë Spartak Ngjelën dhe Nard Ndokën, diskutuan në selinë e Partisë Socialiste për nismën që do t’i dorëzohej Kushtetueses. Pas përfundimit të mbledhjes, lideri i opozitës, Edi Rama, i kërkoi qeverisë shqiptare që të rishikojë në mënyrë më realiste marrëveshjen e nënshkruar me qeverinë greke, pasi ratifikimi i kësaj marrëveshjeje do të ishte një gabim fatal. “U ra dakord që të nënshkruajmë atë hap që ne i ftuam të ndërmerrnim së bashku, për të ankimuar në Gjykatën Kushtetuese këtë marrëveshje krejtësisht të pavend dhe krejtësisht të padenjë, e cila pa asnjë dyshim duhet të zmbrapset, për të krijuar kushtet që të ketë një rinegocim, ku ata që e përfaqësojnë vendin tonë, duhet ta përfaqësojnë denjësisht, si të barabartë mes të barabartëve. Në respekt të plotë të fqinjësisë së mirë, në respekt të plotë të miqësisë të tradicionale, në respekt të plotë të ardhmërisë së dy popujve tanë dhe në funksion të atyre interesave që asnjëherë nuk mund të negociohen dhe aq më pak të preken, për arsye që për momentin janë shumë, shumë të errëta”, tha Rama, pas takimit të djeshëm. Më herët, kreu socialist iu është përgjigjur edhe akuzave për ekstremizëm dhe thirrje ksenofobe ministrit të Jashtëm, Ilir Meta. “Qeveria të hapë rrugën e një shikimi realist dhe të një trajtimi racional të asaj marrëveshjeje, pa u ngutur të bëjë gabimin fatal të ratifikimit të saj. I refuzoj me neveri ato akuza që ju përmendni lidhur me një pozicion të ashtuquajtur ekstremist timin dhe të PS-së, në raport me dokumentin skandaloz të kësaj marrëveshjeje”, tha Rama, duke i përsëritur kreut të LSI-së edhe faktin se braktisi të majtën për çështje pushteti. Marrëveshja për përcaktimin e kufirit detar me Greqinë u firmos mes dy qeverive në muajin prill. Sipas studimit të kolonel Myslim Pasha, rezulton se nga marrëveshja në fjalë shteti shqiptar humbet ose “dhuron” rreth 354 kilometra katrorë det për vendin fqinj. Kjo ka shkaktuar debate të shumta në opinionin publik, ku janë organizuar disa tryeza diskutimi dhe apele publike për qeverinë. Lideri i opozitës, Edi Rama, ka reaguar për herë të parë për këtë çështje vetëm para pak ditësh, ku shpjegoi se ishte ngritur një ekip ekspertësh për të shqyrtuar më në imtësi çështjen. Vonesën në reagim, Rama e ka shpjeguar me faktin se, kur bëhet fjalë për çështje të mëdha, siç është marrëveshja në fjalë, politika duhet të heshtë para ekspertëve. Në rast se Kushtetuesja vendos që fillimisht të pezullojë marrëveshjen, atëherë qeverisë shqiptare i duhet që të shtyjë edhe më tej ratifikimin e marrëveshjes në parlament, deri në vendimin përfundimtar.

Topi të jetë i vëmendshëm

Ngjela: Deputetët, përgjigje penalisht nëse e votojnë

Kryetari i Partisë Ligj dhe Drejtësi, Spartak Ngjela, tha dje, se marrëveshja e qeverisë shqiptare me atë greke për kufirin detar kontestohet, sepse cënohet territori shqiptar dhe ky cënim bëhet me vullnet të plotë, pa e ditur se çfarë po ndodh. Avokati i njohur tha se Gjykata Kushtetuese duhet ta shqyrtojë me urgjencë ankimimin e opozitës, sepse në rast se ajo do të ratifikohet në parlament, deputetët do të ndëshkohen penalisht, në rast se provohet se ka cënim territorial. “Gjykata Kushtetuese duhet ta marrë me urgjencë, duke i vënë parlamentit në dijeni faktin, se edhe sikur të gjithë deputetët të jenë dakord unanimisht, ndëshkohen penalisht në rast se kjo provohet. Dhe kjo nuk ka pse të mos provohet, sepse në rast se nuk do të ishte territor shqiptar 250 kilometra katrorë, nuk do të kishte nevojë për marrëveshje. Atëherë Shqipëria cedon nga territori i saj dhe ky është krim i rëndë”, tha Ngjela. Kreu i PLD-së i kërkoi Presidentit të Republikës, Bamir Topit, që të tregohet më i vëmendshëm dhe ta shohë me përparësi këtë çështje, pasi situata po degradon. “Po degradon situata në sens negativ, ku janë manipuluar zgjedhjet dhe po bëhen marrëveshje të dyshimta. Kjo është arsyeja që sot është imperative çështja e demokracisë dhe e lirisë në Shqipëri, sepse me sapo shohim, kemi të bëjmë me një grup njerëzish që mund të shesin gjithçka. Gjykata Kushtetuese nuk e merr dot në shqyrtim, pasi ratifikohet, sipas Kushtetutës, e merr vetëm përpara”, tha Ngjela, i cili është firmëtar i ankimimit në Kushtetuese.

Veliaj: Të enjten protesta kundër marrëveshjes

Kryetari i Partisë G99, Erion Veliaj, tha dje, se të enjten e ardhshme do të zhvillohen dy protesta kundër marrëveshjes së dyshimtë për përcaktimin e kufijve detarë me Greqinë, ku pretendohet se ka cënim të territorit shqiptar. Veliaj tha se protesta e parë do të zhvillohet në orën 16:00 të së enjtes, para selisë së Ministrisë së Jashtme, e cila ka negociuar marrëveshjen dhe një orë më vonë para selisë së parlamentit, ku do të mbahet seanca parlamentare e radhës. Pas takimit të djeshëm, ku u firmos ankimimi në Gjykatën Kushtetuese, Veliaj tha se kësaj gjykate i kërkohet që të shprehet për pakushtetutshmërinë dhe shkeljen e ligjit në këtë marrëveshje. Po ashtu, Veliaj tha se vendimi i qeverisë për shtyrjen e ratifikimit të marrëveshjes në parlament është vetëm një shtyrje e tradhtisë për një kohë të mëvonshme. “Ajo që duam t'i kujtojmë Ilir Metës dhe Sali Berishës, është se, duke shtyrë ratifikimin e marrëveshjes, praktikisht po na thonë ne, që janë duke e shtyrë tradhtinë e Shqipërisë për në një kohë më të vonë. Ne nuk biem dakord me këtë qartazi, sepse nuk besojmë se mund të jesh shqiptar part-time: ose je shqiptar, ose nuk je i tillë. Kjo do të thotë që çdo karagjoz, qoftë ky kryeministri apo zëvendësi i tij, që na e thonë që po e shtyjnë këtë tradhti thjesht për një kohë më të vonë. Duam t’u kujtojmë që e kanë gabim. Do të përballen me të gjithë revoltën qytetare”, tha Veliaj.

Tërhiqet Kuvendi, shtyn ratifikimin, qeveria nis shpjegimet

Mungon data e saktë e ratifikimit të marrëveshjes, që ishte parashikuar të bëhej më 19 tetor. Ministria e Mbrojtjes shpjegon marrëveshjen dhe hedh poshtë akuzat

Kreshnik KUÇAJ

Kuvendi i Shqipërisë bëri një hap mbrapa duke mos përfshirë në kalendarin trijavor të punimeve ratifikimin e marrëveshjes për përcaktimin e kufirit detar mes Shqipërisë dhe Greqisë, ndërsa për herë të parë qeveria ka nisur që të japë sinjalet e transparencës për marrëveshjen në fjalë. Kjo marrëveshje ishte parashikuar që të ratifikohej në seancën parlamentare të 19 tetorit, por burime kuvendore i thanë dje medias, se në axhendën trejavore të punimeve nuk është përcaktuar asgjë për ratifikimin e kësaj marrëveshjeje. Ndërkohë, Kuvendi nuk jep asnjë të dhënë se kur mund të bëhet ky ratifikim. Nga ana tjetër, qeveria duket se ka nisur një fushatë transparence për marrëveshjen në fjalë, e ndikuar kjo edhe nga artikulimi i qartë i kundërshtimit të opozitës vendase. Pas deklaratës së kryetarit të Partisë Socialiste, Edi Rama, kanë ardhur edhe reagimet e para të anëtarëve të kabinetit qeveritar. Ministri i Mbrojtjes, Arben Imami, ka organizuar dje një takim me përfaqësues të medias, ku është diskutuar pikërisht për këtë çështje. Nga ana tjetër, Ministria e Mbrojtjes i ka shpërndarë medias edhe të dhënat e saj për marrëveshjen në fjalë, duke sqaruar edhe ato që cilësohen si “keqkuptime” për sa i përket cënimit të kufijve të shtetit shqiptar. Në takimin me gazetarët, Imami ka ftuar Partinë Socialiste që të dërgojë ekspertët e saj në Ministrinë e Mbrojtjes për të zbardhur të vërtetat e koordinatave të reja që kanë përcaktuar ndarjen kufitare me Greqinë. Duke iu referuar dyshimeve të medias, se pas kësaj marrëveshjeje fshihen interesat e Greqisë për gazsjellësin rus, Imami tha se, gjithsesi, Shqipëria nuk bënte pjesë në interesat gjeostrategjike të shtetit rus.

Qartësimi i ministrisë

Ministria e Mbrojtjes nisi dje bërjen e transparencës për marrëveshjen e nënshkruar me shtetin grek për përcaktimin e kufirit detar. Nëpërmjet një prezantimi kompjuterik, Ministria e Mbrojtjes ka trajtuar një nga një të gjithë pretendimet e ngritura për cënim të territorit shqiptar, duke i hedhur poshtë këto pretendime nëpërmjet argumenteve të saj. Në konkluzionet e saj, Ministria e Mbrojtjes vëren se ka mungesë profesionalizmi në përdorimin e hartave për të llogaritur koordinatat në det. Po ashtu, Ministria e Mbrojtjes pretendon se në studimin, ku thuhet se nga marrëveshja cënohet territori shqiptar, ka gabime në disa përllogaritje, sepse është neglizhuar ishulli i banuar i Othonit dhe shkëmbi Barketa, duke sjellë edhe gabimet në përllogaritje. “U vërtetua se pretendimet e ngritura në media nuk qëndrojnë”, thuhet në fund të argumentimit të Ministrisë së Mbrojtjes, e cila doli në mbrojtje të marrëveshjes.

Argumentet

Pika 150 është 22 kilometra afër bregut tonë, duke bllokuar ngushticën e Otrantos

Vija ndarëse nuk është e baraslarguar nga vijat bazë të të dy vendeve

Është neglizhuar Gjiri i Sarandës

Ishulli Barketa nuk duhej të merrej si pikë referimi për vijën bazë

Është cënuar sovraniteti pranë Ishullit Tongo dhe Kepit Stillo

Është ndryshuar kufiri i vjetër

Është trajtuar Greqia si shtet arkipelag

Është nxituar realizimi i marrëveshjes

Pretendimi se Shqipëria në këtë mënyrë humbet një sipërfaqe ujore prej 354.4 kilometrash katrorë

Kundërargumentet

Mungesë profesionalizmi në përdorimin e hartave për të llogaritur koordinatat në det