Masakra, kryepolicët në pyetje për operacionin “Dajti”

TIRANË - Hetimet për masakrën me 4 policë të vdekur po zhvillohen në dy plane: mbi rolin e Dritan Dajtit në ngjarjen e rëndë dhe “të çarat” në planin operacional për kapjen e tij. Marrja në pyetje e organizatorëve të operacionit policor, ku humbën tragjikisht jetën katër policë, si dhe dokumentet procedurale mbi ndërhyrjen

TIRANË - Hetimet për masakrën me 4 policë të vdekur po zhvillohen në dy plane: mbi rolin e Dritan Dajtit në ngjarjen e rëndë dhe “të çarat” në planin operacional për kapjen e tij. Marrja në pyetje e organizatorëve të operacionit policor, ku humbën tragjikisht jetën katër policë, si dhe dokumentet procedurale mbi ndërhyrjen pritet të jenë lëvizja e radhës e prokurorëve të Krimeve të Rënda. Burime të rezervuara pranë organit të akuzës thanë se do të marrin në pyetje shefat që nisën me ngut në operacion  Fatos Xhanin, Altin Dizdarin, Saimir Duçkollarin dhe Kastriot Feskën. Sipas burimeve, mësohet gjithashtu, se do të administrojnë çdo dokument që lidhet me operacionin, që nga urdhri i nisjes së vëzhgimeve e deri te dokumentet finale që urdhëruan arrestimin e Dritan Dajtit. Paraprakisht, mësohet se mes të pyeturve do të jetë edhe Arian Muça, shefi i departamentit të Krimit të Organizuar në Drejtorinë e Përgjithshme të Policisë së Shtetit, nga i cili varej grupi prej 13 punonjësish të operacioneve speciale. Ndërkohë, në listën e personave që do të merren në pyetje janë edhe drejtues të lartë në Policinë e Shtetit. 

Operacioni “Dajti” 

Çdo veprim hetimor, çdo urdhër i dhënë, që nga mbajtja nën vëzhgim e Dritan Dajtit e deri në mesditën e 7 gushtit, kur u dha edhe urdhri përfundimtar për arrestimin e tij, do të kalojë në duart e grupit të hetimit. Pas të arrestuarve të marrë në pyetje, pas pyetjes së gruas së 38-vjeçarit që kryesonte deri para pak ditësh listën e më të kërkuarve, pjesëtarët e grupit hetimor kanë kërkuar verifikimin e hollësishëm të dokumenteve procedurale të operacionit “Dajti”, për të cilin dyshohet se nuk ka pasur një plan të detajuar e të mirëmenduar. Duke e konsideruar si një ndër pikat kyçe për zbardhjen e plotë të ngjarjes, një burim pranë grupit hetimor tha se: “Kjo lëvizje do të ndikojë edhe në ndërtimin e skemës përfundimtare të ngjarjes”.

Kryepolicët në pyetje

Puna për verifikimin e tyre duket tashmë në rrugën e duhur, ndërsa organizatorët e operacionit policor do të jenë personat e radhës që do të merren në pyetje. Mes tyre mësohet se është edhe Arian Muça, kreu policor nga i cili vareshin drejtpërdrejt Xhani, Dizdari, Duçkollari dhe Feska. Muçës do t’i duhet që të japë shpjegime në lidhje me të gjitha etapat e operacionit, që nga momenti i lokalizimit të super të kërkuarit, tek urdhërimi i mbajtjes në vëzhgim të tij e deri te përmbyllja e operacionit, etapa e arrestimit, për të cilin thuhet se duhej të vihej në lëvizje reparti i RENEA-s. Ndër verifikimet më të rëndësishme pritet të jetë edhe përgjigjja e analizave, që i është nënshtruar dokumenti më i ri i Policisë së Shtetit, që iu gjet Dajtit brenda në makinën “Tuareg”. Prodhimi i kartës me elementet më të fundit të sigurisë duket se do të tregojë edhe mënyrën sesi Dajti e kishte siguruar një dokument të tillë zyrtar, nën emrin Agron Zeneli dhe me foton e vërtetë të tij. Sipas kartës policore, Agron Zeneli, që në realitet ishte i kërkuari Dajti, rezultonte si nënkomisar i policisë së Korçës. Nga burime të grupit hetimor bëhet e ditur se të vetmet përgjigje të përfunduara deri tani, janë ato të Institutit të Mjekësisë Ligjore, që kanë provuar se plumbat me të cilat janë vrarë katër efektivët i përkasin së njëjtës armë. Ndërkohë, organi i akuzës duket se është në pritje të raportit nga Laboratori i Kriminalistikës, pas ekspertizës që do t’i kryhet armës tip pistoletë, që përdorej nga Dajti.

Sekuestrimi

Telefonat e Dajtit, dyshime

për lidhje me pushtetarë

TIRANË - Telefonat celularë të Dritan Dajtit, të sekuestruar nga Prokuroria e Krimeve të Rënda, pritet të zbardhin misterin e gjashtë viteve të tij në arrati. Burime nga grupi hetimor bëjnë me dije se autorit të masakrës i janë sekuestruar disa telefona, një pjesë e të cilëve të mbyllur, ku mendohet se fshihen emrat e njerëzve të cilët i kishin dhënë mbrojtje Dritan Dajtit. I shumëkërkuari për 6 vjet me radhë qarkullonte lirshëm në vend, ndërsa dyshohet se ka hyrë e dalë disa herë nga territori shqiptar “pa i hyrë gjemb në këmbë”. Nga ana tjetër, janë disa operacionet policore që kanë dështuar për kapjen e tij, pasi Dajti sinjalizohej në kohën që forcat speciale ishin rrugës drejt vendstrehimit të radhës. Të gjithë këto dyshime të lënë të mendosh se lidhjet e Dritan Dajtit me njerëz në pushtet kanë qenë të forta, e këto dyshime janë në proces verifikimi prej prokurorëve Eugen Beci dhe Ardian Nezha. Nga ana tjetër, grupi i hetimit u ka kërkuar kompanive celulare tabulatet telefonike të numrave që kishte nën përdorim Dritan Dajti, për të zbardhur të gjithë dyshimet e mësipërme. Sa i përket operacionit të së premtes, kreu i Policisë së Shtetit, Ahmet Prençi, pohoi në një intervistë televizive, se ishte i vetmi operacion i padekonspiruar për kapjen e Dritan Dajtit. Për këtë arsye, edhe numri i punonjësve të policisë, që kanë qenë në dijeni të identitetit të shënjestrës, ka qenë shumë i kufizuar. Kjo mendohet të jetë edhe një nga arsyet se përse grupi operacional nuk ishte i pajisur me jelekë antiplumb, apo i përgatitur për një kundërpërgjigje fatale të të shumëkërkuarit, siç ishte ajo e së premtes që u mori jetën 4 punonjësve të Policisë së Shtetit. E. Elezi