Hyrje | Aktualitet | Lutaj: Masakra e Durrësit të hetohet nga Kuvendi

Lutaj: Masakra e Durrësit të hetohet nga Kuvendi

Madhesia e germave:

Deputeti socialist i 9-i i zgjedhur në Qarkun e Fierit, thotë se do t’i propozojë partisë nismën e krijimit të komisionit kuvendar për ngjarjet e fundit. Deputeti i Partisë Socialiste, Pirro Lutaj, deklaroi dje, se do t’i propozojë forcës së tij politike që të ndërmarrë iniciativën kuvendare për të ngritur një komision hetimor kuvendar për të hetuar masakrën e 7 gushtit, ku gjatë operacionit për arrestimin e të shumëkërkuarit

Deputeti i Partisë Socialiste, Pirro Lutaj, deklaroi dje, se do t’i propozojë forcës së tij politike që të ndërmarrë iniciativën kuvendare për të ngritur një komision hetimor kuvendar për të hetuar masakrën e 7 gushtit, ku gjatë operacionit për arrestimin e të shumëkërkuarit Dritan Dajtit mbetën të vrarë 4 efektivë policie. Sipas ish-drejtorit të Policisë së Burgjeve, aktualisht deputet i PS-së, ky komision hetimor do të ketë si objekt shqyrtimi edhe ngjarjet e rënda të ndodhura së fundmi dhe verifikimin e veprimtarisë së Policisë së Shtetit. “Në konstituimin e kuvendit të ri, unë do të kërkoj nga Partia Socialiste, nga kolegët e mi, që një nga objektet e punës së kuvendit që në fillim, të jetë ngritja e një komisioni për të verifikuat veprimtarinë e Policisë së Shtetit, në mënyrë të veçantë në këto dy-tri ngjarje të rënda të kohëve të fundit. Ka rreth tre muaj që është ndarë nga jeta ish-deputeti i Partisë Socialiste, Fatmir Xhindi dhe nuk flitet asnjë fjalë për të. Nuk janë të rastësishme ngjarjet që kanë ndodhur. Janë vrarë qytetarët mu në mes të qytetit, janë vrarë funksionarë të lartë të shtetit, u plagos anëtari i Gjykatës së Lartë në mes të Tiranës dhe nuk kemi sot asnjë pistë të zbulimit të autorit e kështu me radhë”, tha Lutaj për median vizive. Duke u ndalur te ngjarja e rëndë e Durrësit, ku mbetën të vdekur 4 efektivë policie, deputeti socialist tha se, pavarësisht se aktualisht është kohë pushimesh, kryeministri dhe strukturat drejtuese të Policisë së Shtetit duhet të merren me analizën e kësaj ngjarjeje dhe personat përgjegjës të mbajnë përgjegjësinë. Duke shkuar më tej, Lutaj tha se njerëz të rëndësishëm të Policisë së Shtetit, të cilët kanë qenë pas operacionit, tashmë po fshihen dhe nuk dalin të thonë sesi u organizua operacioni për arrestimin e Dritan Dajtit dhe pse dështoi ai. “Unë kam informacion, që mbrapa shpatullave të këtyre punonjësve, të cilët nuk jetojnë më, kanë qenë njerëz të rëndësishëm të Policisë së Shtetit, të cilët tani fshihen dhe nuk dalin të thonë sesi e organizuan, pse e organizuan këtë operacion dhe si dështoi operacioni. Ky është problemi, që mendoj unë se presin të dëgjojnë shqiptarët dhe jo të lexojnë në çdo gazetë opinione të ndryshme se çfarë spektaklesh paska bërë krimineli Dritan Dajti herë pas here me policinë. Ai është pajisur me dokument i pari, sa herë që ndryshoheshin dokumentet. Në këtë strukturë të policisë, ku mungon besimi për gjithçka dhe nga kushdo gjëja që të shkon në mendje më së pari është dekonspirimi. Këto janë përgjigje që duhen të jepen. Mungon besimi në strukturat e policisë dhe meqë mungon ky besim, dekonspirimi është shumë prezent”, tha Lutaj, i cili pritet të shtrojë për diskutim në PS propozimin e tij për ngritjen e komisionit hetimor kuvendar. Ndërkohë, para pak ditësh, efektivët e policisë, Fatos Xhani, Kastriot Feska, Saimir Duçkollari e Altin Dizdari mbetën të vrarë në operacionin për arrestimin e të shumëkërkuarit Dritan Dajti. Edhe pse operacioni ka sjellë prangosjen e të kërkuarit, pasojat e këtij arrestimi kanë sjellë reagime të forta për mënyrën sesi ky operacion është kryer dhe tashmë kanë nisur të shfaqen publikisht edhe zërat që kërkojnë që të mbahen përgjegjësitë përkatëse për këtë tragjedi.

Ceka kërkon analizë

Koçi: Nishani duhet të japë dorëheqjen

Pas vrasjeve së katër efektivëve të policisë gjatë operacionit për arrestimin e të shumëkërkuarit Dritan Dajti, ish-ministri i Rendit Publik në vitet 1998-1999, Petro Koçi, ka kërkuar që ministri i Brendshëm, Bujar Nishani, të japë dorëheqjen si shenjë papërgjegjshmërie për atë që ka ndodhur. Sipas Koçit, masakra ku humbën jetën katër efektivët e policisë, Fatos Xhani, Kastriot Feskaj, Saimir Duçkollari e Altin Dizdari, erdhi si pasojë e mangësive në organizim, drejtim dhe ekzekutim, prandaj për këtë duhet që dikush të mbajë përgjegjësi. “Mendoj që përveç masave administrative në rang të Drejtorisë së Përgjithshme të Policisë, duhet të kemi edhe një reflektim të përgjegjshëm dhe serioz nga ana e ministrit të Brendshëm, i cili pas kësaj ngjarjeje mendoj se duhet të japë dorëheqjen”, tha Koçi. Sipas tij, kjo ngjarje e ka çuar vendin në atmosferën e viteve 1997-1998, ku në ambientin publik nuk sundonte ligji dhe drejtësia, por krimi dhe bandat. Duke vijuar më tej, Koçi mendon se në radhët e policisë, përveç shkarkimeve, duhet të ketë edhe ndjekje penale për drejtuesit e operacionit. Po ashtu, ish-ministri i Rendit tha se pas kësaj ngjarjeje nevojitet një analizë e thellë, në mënyrë që të shmanget që të ketë viktima të tjera në radhët e policisë. Ndryshe nga Koçi, ish-ministri i Rendit, Neritan Ceka, tha se operacioni për arrestimin e Dajtit ishte një operacion kurajoz. Sipas tij, është bërë një gabim me veshjet e efektivëve të policisë, të cilët nuk ishin me uniformë, por do të jetë prokuroria ajo që do të përcaktojë modalitetin sesi është zhvilluar ky aksion për të zbuluar, më pas edhe gabimet e mundshme. Duke mos përmendur çështjen e dorëheqjes apo jo të ministrit të Brendshëm, Ceka tha se nevojitet një analizë e thelluar e ngjarjes, për të mos lejuar që kjo masakër të përsëritet sërish në operacione të tjera. “Mendoj që operacioni është zhvilluar me guxim. Ai duhet të çonte në paralelizmin e të kërkuarit, por reagimi ka qenë jashtë parashikimit. Drejtësia do të bëjë punën e vet për dënimin e përgjegjësve, por duhen nxjerrë edhe mësime për pajisjen e njerëzve që marrin pjesë në aksione të tilla me të gjithë mjetet e nevojshme”, tha Ceka.

Shto tek: Add to your del.icio.us